Бүгін Қазақстан Республикасы Президенті жанындағы Орталық коммуникациялар қызметінің баспасөз конференциясында тілдерді дамытудың қоғамды топтастырудағы және оның бәсекеге қабілеттілігін арттырудағы орны туралы айтылды.
Брифингке «Ш.Шаяхметов атындағы Тілдерді дамытудың республикалық үйлестіру-әдістемелік орталығы» РМҚК директоры міндетін атқарушы Қ.І. Әбіл, оқу-әдістемелік және ұйымдастыру бөлімінің басшысы Л.Қ. Есбосынова, лингвистикалық зерттеулер және терминология бөлімінің басшысы С.А.Итегулова қатысты.
Орталық басшысы Елбасының 5 институционалдық реформасына сәйкес «Болашағы біртұтас ұлт – елдігіміздің кепілі» тақырыбында баяндама жасады.
Баяндамада «Мәңгілік ел» идеясын жүзеге асыру барысында тіл дамыту орталықтарының алатын орнына тоқталып, мемлекет басшысының алға қойған міндеттерін жүзеге асыру үшін мекемеде жоспарланған ауқымды жобаларды санамалап берді.
Оқу-әдістемелік және ұйымдастыру бөлімінің басшысы Л.Қ. Есбосынова оқыту әдістемесін біріздендіру, Тіл оқыту орталықтары оқытушыларының біліктілігін арттыруға байланысты атқарылып жатқан жұмыстарға тоқталды.
Брифингтің соңында мекеме басшысы: «Біздің басты мақсатымыз- «Болашағы біртұтас ұлт – елдігіміздің кепілі» идеясын басшылыққа ала отырып, мемлекеттік тапсырыс пен мемлекеттік тапсырмаларды орындау арқылы тілдің ғылыми және қолданбалы жағын зерттейтін, тіл саясатының орындалуына мұрындық бола алатын әлеуеті жоғары, білікті мамандардан жасақталған ғылыми-лингвистикалық ұйым қалыптастыру» деп қорытты.
Пікір жазу
Пікір орналастыру үшін кіруіңіз жөн.